23. 6. 2021: Одкрыли Едукацийно-Етноґрафічный Парк, офіцийні одкрыли і выставу з лемківскым облечыньо
В Скансені Погіряньского Села в Шымбарку в пятницю, 18. червця/юнія, одкрыто едукацийный парк істориі народного будівництва та машын з польско-словацкого погранича. Присутны были політикы і локальны власти.
В торжественным отвертю Едукацийно-Етноґрафічного Парку в Шымбарку участ взяли м.ін. посланкыня Барбара Бартусь, радны малопольского воєвідства Марта Мордарска і Ядвіґа Вуйтович, ґорлицка старостка Мария Ґубала, бургомайстер Ґорлиц Рафал Кукля, директорка Департаменту Культуры і Нацийональной Спадковины Маршалківского Уряду Малопольского Воєвідства Моніка Ґубала, а тіж партнеры проєкту Одкрыты Музеі і соспільны діячы.
Боденка, кєрат, стежка оддзеркаляюча формы
Парк основали в рамках партнерского проєкту «Одкрыты Музеі – пошыріня проґрамовых можливости інституций культуры польско-словацкого погранича». Едукацийный парк має форму сенсоричной загороды.
В парку находят ся зреконструуваны нарядя і цілы обєкты. Єст колиба з хлібовыма пецами ци ковальскій міх. Єст великій лябіринт збудуваный з балів, з вельома дверями внутрі, котрый дозвалят одвиджаючым познати технікы конструкциі хоснуваны давныма столярями. Великым дептаковым колесом мож пустити в рух велич боденку. Вшыткы запроєктуваны елементы навязуют до традицийных народных обєктів.
Одвиджаючы можут самы зробити си масло, змолоти зерно на муку, спрібувати традицийне паля печене в специяльным пеци. Ціліст єст так запроєктувана, жебы корыстати могли з ней наймолодшы та непелносправны особы.
Окрем парку і выстава облечыня
«То выняткова подія, барз цінна для нас, жытелів той обшыри» – повіла ґорлицка старостка Мария Ґубала. «Істория того місця сігат десяток поколінь дозаду, якы тоту культуру творили. Мы єй спадкоємці. Барз ся тішу, што в ґорлицкым повіті є такє місце. Як старостка ґорлицкого повіту передаю вдячніст в імени його жытелів і пошану для вшыткых тых, котры причынили ся до возникніня того ориґінального едукацийно-етноґрафічного парку» – підкрислила.
Разом з презентацийом новой атракциі ґорлицкого повіту офіцийні одкрыли тіж выставу «Погіряны і сусіды – народне облечыня з реґіонів Польщы і Словациі», котра вказує святочне народне облечыня Погірян, Лемків, Сандецкых Ляхів, Спишаків і Шаришан.
Торжественно одкрыли і перетяли басамунку урядникы малопольского воєвідства, в тым маршалок Вітольд Козловскій. Як підкрислил, ідея едикацийного парку зреализувана Музейом Дворы Карвациянів і Ґладышів дозволит не лем підтримати нацийональну спадковину, але тіж розвивати реляциі з нашыма сусідами Словаками.
Парк і выстава сут частю великого медженародного проєкту Одкрыты Музеі, реализуваного в Польщы і на Словациі. Лідером проєкту являт ся ґорлицкій Музей Дворы Карвациянів і Ґладышів.
Фот. горі: powiatgorlicki.pl
Наталія МАЛЕЦКА-НОВА, ЛЕМ.фм, фот. muzeaotwarte.pl
(Публікуєме в оріґіналї – лемківскім варіантї русиньского языка.)
